Kosova

Haradinaj reagon pas rastit të policit që dhunoi 16-vjeçaren

Kryeministri i Kosovës, Ramush Haradinaj, ka reaguar pas raportimeve se një polic e ka dhunuar dhe e ka detyruar një vajzë të moshës 16-vjeçare të abortojë.

E gjithë ngjarja ka ndodhur në Drenas, ndërsa është bërë publike nga mediat mbrëmjen e kaluar.

“Me shqetësim mora lajmin për rastin e fundit të abuzimit seksual me të miturën nga Drenasi. Jam i tronditur që një mësues që i besojmë fëmijën dhe një polic që i besojmë sigurinë, të abuzojnë me një të mitur. Përgëzoj reagimin e shpejtë të autoriteteve komunale dhe qendrore ndaj këtyre abuzuesve. Bashkëndiej me familjen e të abuzuares dhe i siguroj që organet e drejtësisë do të merren me rastin seriozisht. Dua t’i falënderoj mediat për angazhimin e pandalshëm që të raportojnë për raste të tilla dhe të shtyjnë reagimin institucional dhe shoqëror. Apeloj te të gjitha vajzat dhe gratë që janë cak i abuzimeve dhe kërcënimeve të kësaj natyre, të paraqesin rastet dhe të raportojnë dhunuesit”, ka shkruar Haradinaj në Facebook.