Këshilli i BE-së thotë se Kosova ka progres të limituar në luftimin e korrupsionit

(KEYSTONE/Martin Ruetschi)

Këshilli i Çështjeve të Përgjithshme të Bashkimit Evropian në nivel të ministrave, për Kosovën, pritet ta nënvizojë faktin se ka pasur progres të limituar në luftën kundër korrupsionit, krimit të organizuar dhe sundimit të ligjit.

Në takimin ku pritet të diskutohet edhe për procesin e zgjerimit, parashihet edhe një draft për Kosovën. Në draftin e konkluzave thuhet po ashtu që nga Kosova pritet të implementojë pa vonesa obligimet nga marrëveshja e arritur në Bruksel, aneksi në Ohër, por edhe obligimet e tjera që dalin nga procesi i dialogut. Kjo porosi i është dhënë edhe në pjesën e draftit kur flitet për Serbinë, shkruan Koha.net.

Si për Kosovën, ashtu edhe për Serbinë, procesi i normalizimit është i domosdoshëm për të avancuar në rrugëtimin evropian, thuhet në draft.

Do të dënohet dhuna e protestuesve serbë ndaj pjesëtarëve të KFOR-it, organeve të rendit dhe mediave gjatë trazirave në veri në fund të majit dhe thuhet se nuk mund të ketë justifikim për dhunë. Do të dënohet edhe sulmi ndaj Policisë së Kosovës në Banjskë më 24 shtator.

Për dialogun pritet që edhe këtë herë BE-ja të ftojë Kosovën e Serbinë që të angazhohen në mënyrë konstruktive për të gjetur zgjidhje, së pari për situatën në veri, e pastaj edhe për të avancuar drejt një marrëveshjeje gjithëpërfshirëse ligjërisht të obligueshme, ku do të zgjidhnin të gjitha çështjet kyçe. Në veçanti, pritet që të përshëndetet gatishmëria e shprehur e Kosovës dhe Serbisë për të pranuar draftin e BE-së për Asociacionin, përcjell albinfo.ch.

BE-ja pritet që ta mirëpresë faktin që Kosova mbështet bllokun në qëndrimet sa i përket agresionit të Rusisë ndaj Ukrainës, agresion të cilin Kosova e ka dënuar fuqishëm dhe ka mbështetur të gjitha sanksionet. Pritet të thuhet se kjo dëshmon qartë orientimin e Kosovës drejt BE-së.

Në konkluzat [BB1] që kanë të bëjnë me Kosovën, Këshilli i BE-së do ta mirëpresë faktin që më 1 janar do të nisë zbatimi i procesit të liberalizimi të vizave.