KFOR-i kërkon konsultime para aksioneve të Policisë së Kosovës

Misioni i NATO-s në Kosovë, KFOR, është shprehur se është njoftuar pak para aksionit të Policisë në veri në gjashtë njësi të Bankës Postare Kursimore të hënën.

Po ashtu, KFOR-i ka thënë se “pret konsultime me kohë për çdo veprim të Policisë së Kosovës apo të Forcës së Sigurisë së Kosovës, që mund të ndikojë në sigurinë rajonale”.

KFOR-i ka shtuar se dialogu është e vetmja rrugë për zgjidhjen e çështjeve dhe gjetjen e zgjidhjeve.

Policia e Kosovës ka mbyllur të hënën gjashtë njësi të Bankës Postare Kursimore në veri, të cilat kanë vepruar ilegalisht që nga paslufta. Në to u konfiskuan rreth 1.6 milionë euro dhe mbi 74 milionë dinarë.

Përmes Bankës Kursimore distribuohen pagat, pagesat për skemat sociale dhe beneficionet tjera që Serbia i ndan për serbët e Kosovës në dinarë.