Kjo është shifra e shpenzimeve ruse të deritanishme për luftën në Ukrainë

Që nga 24 shkurti i vitit 2022, prej kur filloi agresioni rus në Ukrainë, Rusia ka shpenzuar rreth 167.3 miliardë dollarë për luftën kundër Ukrainës.

Prej kësaj shume, 34 miliardë dollarë pajisje u shkatërruan vetëm nga Forcat e Armatosura të Ukrainës.

Sipas të dhënave, të llogaritura nga “Forbes”, të bazuara në të dhënat nga Shtabi i Përgjithshëm i Forcave të Armatosura të Ukrainës, çdo ditë Rusia shpenzon rreth 300 milionë dollarë për luftën kundër Ukrainës, përcjell albinfo.ch.

Shpenzimet më të mëdha janë kryer në: sigurimin e operacioneve ushtarake (51.3 miliardë dollarë), pagat e ushtarakëve (35.1 miliardë dollarë), kompensimi për familjet e të vdekurve (25.6 miliardë dollarë), të plagosurit (21 miliardë dollarë) dhe kostoja e pajisjeve të shkatërruara (34 miliardë dollarë).

Sipas Shtabit të Përgjithshëm të Forcave të Armatosura të Ukrainës, shuma e humbjeve ruse në muajt e fundit ka arritur nivel dukshëm më të lartë se vitin e kaluar.

---