Kosova pritet të bëhet me bursë

Ka gjasa që kjo të bëhet bashkë me Malin e Zi si dy vende që e përdorin euron si valutë ose të bëhet ndonjë bursë regjionale

Kosova brenda një periudhe jo shumë të gjatë pritet t’u bashkohet shteteve të zhvilluara, duke u bërë edhe me bursë.

Ky plan që është në fazën fillestare të zhvillimit, po realizohet nga Ministria e Financave dhe Banka Qendrore, të ndihmuar edhe nga ekspertë të siguruar nga USAID-i amerikan.

Drejtuesit e Bankës Qendrore të Kosovës thonë se ky plan mund të realizohet.

Sipas tyre, ka gjasa që kjo të bëhet bashkë me Malin e Zi si dy vende që e përdorin euron si valutë ose të bëhet ndonjë bursë regjionale.

Një plan të tillë për një bursë para disa kohësh e ka shfaqur edhe kryeministri i Shqipërisë, Sali Berisha, por që ky plan vazhdon të mbetet vetëm synim i shkruar në letër.

Nga shtetet me të cilat vendi ynë rrethohet dhe që kanë funksionale bursën janë vetëm Maqedonia dhe Serbia.