Kosovë: 420 milionë euro për rimëkëmbje ekonomike

Qeveria e Kosovës ka ndarë 420 milionë euro për ringjallje të ekonomisë pas goditjes që mori ky sektor nga pandemia.

Ministri kosovar i Financave, Hekuran Murati deklaroi se 190 milionë euro do të vijnë nga buxheti ndërsa 230 milionë euro do të vijnë nga huamarrja. Megjithatë sipas nevojës, Murati theksoi se mund të mobilizohen edhe mjete të tjera.

Ndërsa zyrtarë të Administratës Tatimore të Kosovës njoftuan se mbi 200 biznese kanë aplikuar deri më tani për të përfituar nga kjo pako.

Ndërkohë, dhjetëra biznese që janë kontaktuar nga Euronews Albania janë shprehur se nuk e kanë idenë fare për këtë shpërndarje fondesh ose thonë se kriteret e vendosura nga qeveria janë të parealizueshme, përcjell Albinfo.ch.

Sipas Dardan Abazit, hulumtues pranë INDEP (Institutit për Politika Zhvillimore), problemi qëndron te mungesa e një fushate informuese për këtë pako nga ana e qeverisë. Sipas tij kjo është më shumë “një tentativë për t’u dukur sikur po punohet” nga ana e qeverisë së Kosovës. Abazi tha se kjo dëshmohet nga aplikimi i vetëm 200 bizneseve nga afro 200 mijë që janë të regjistruar.

“Shpresoj shumë që të jetë një mësim për të ardhmen që të mos planifikohen masa të cilat nuk kanë një bazë të kritereve dhe objektivave të cilat duan t’i arrijnë,” – u shpreh ai.

Ndërkohë për ekspertin e ekonomisë Safet Gërxhaliun ekonomia e Kosovës është ndihmuar nga diaspora dhe të ardhurat e emigrantëve.

“Në Kosovë ka pasur efekt më të madh për rimëkëmbjen ekonomike kontributi i diasporës sesa pakot e mbështetura dhe të miratuara në Parlamentin e Kosovës,” – tha eksperti Gërxhaliu.

Ndërkohë, ditë më parë qeveria miratoi edhe fondin prej 17 milionë euro si pjesë e kësaj pakete ndihme, në mënyrë që të vijojë mbështetja për pensionistët dhe familjet me asistencë sociale deri në fund të vitit.

 

 

---