Kosovë: Naftëtarët paralajmërojnë mbyllje të pompave në rast se nuk u plotësohen kërkesat

Shoqata e Naftëtarëve të Kosovës është shprehur kundër vendimit të paralajmëruar të Qeverisë për rregullimin e çmimeve të derivateve në vend, sipas së cilit parashihen kufizime në fitimet e naftëtarëve.

Përmes një letre që kjo shoqatë ua ka dërguar kryeministrit Albin Kurti dhe ministrave, ka kërkuar ulje të akcizës dhe TVSH-së për produktet e naftës. Madje ata kanë paralajmëruar edhe mbyllje të pompave të derivateve në gjithë vendin, nëse kërkesat e tyre s’merren parasysh.

“Qeveria, nëse me të vërtetë është e interesuar të mbrojë konsumatorin, do të ishte e pritshme të reagonte njëlloj me Qeveritë e vendeve të rajonit dhe të BE-së nëpërmjet uljes së akcizës dhe/ose TVSH-së për produktet e naftës”, thuhet në letrën e tyre.

---