Kosovë: Pas 1 shkurtit, pagat sipas ligjit të ri

Ilustrim

Kryeministri i Kosovës, Albin Kurti, njoftoi se nga shkurti i vitit 2023 pagat për punëtorët e sektorit publik do të merren sipas ligjit të ri, i cili u aprovua ditë më parë në Kuvend.

“Prej 1 shkurti hyn në fuqi totali i përgjithshëm i buxhetit për paga, i cili është 745 milionë euro. Për ne pikënisja është tërësia. Andaj ne s’e kemi pasur si pikënisje vlerën e koeficientit, por tërësinë e buxhetit. Në muajin janar kjo do të vendoset sigurisht dhe pas 1 shkurtit do të fillojnë pagat me Ligjin e pagave”, tha Kurti, përcjell albinfo.ch.

Ndërkaq, për caktimin e vlerës së koeficientit, ai tha se do të ndodhë në janar të vitit të ardhshëm.

“Ne nuk mund ta përcaktojmë koeficientin në Ligjin e pagave, sepse kjo lidhet me buxhetin dhe do ta bëjmë në muajin janar. Ju po kërkoni tash, përafërsisht sot, më 24 dhjetor, unë po kërkoj pak durim prej juve dhe jo përafërsisht, por saktësisht në janar 2023”, theksoi Kurti.