Kryetari i PDK-së takohet me ambasadorin amerikan, flasin për kërkesën për zgjedhje të parakohshme

Foto FB: Memli Krasniqi

Kryetari i Partisë Demokratike të Kosovës, Memli Krasniqi, ka njoftuar se sot është takuar me ambasadorin e Shteteve të Bashkuara të Amerikës në Kosovë, Jeffrey Hovenier.

Përmes një njoftimi në rrjetin social “Facebook”, Krasniqi ka bërë të ditur se në takim kanë diskutuar për zhvillimet e fundit në vend dhe për kërkesën për zgjedhje të parakohshme.

“Në zyret e Grupit Parlamentar të PDK-së, sot takova ambasadorin e SHBA-së, Jeffrey Hovenier, me të cilin diskutuam për zhvillimet e fundit politike në vend. Ambasadorin Hovenier e njoftova me qëndrimet e PDK-së rreth këtyre zhvillimeve dhe me arsyet e kërkesës tonë për zgjedhje të parakohshme. Ne besojmë se vendi është në stagnim të plotë dhe ata që po e pësojnë më së shumti janë qytetarët tanë”, ka shkruar ai, transmeton albinfo.ch.