Kufizime për udhëtimet nga Shqipëria drejt Francës e Belgjikës

Të gjithë udhëtarët nga aeroporti i Tiranës që nuk janë rezident dhe kanë destinacion Francën dhe Belgjikën duhet të jenë të pajisur me pasaportën e vaksinimit, test PCR, ose duhet të paraqesin provën e kalimit të infeksionit.

Aeroporti ndërkombëtar “Nënë Tereza” ka njoftuar se personat që nuk janë të vaksinuar mund të udhëtojnë drejt Francës vetëm për arsye të rëndësishme.

“Të gjithë personat që udhëtojnë nga Tirana International Airport drejt Francës duhet të jenë të pajisur me pasaportën e vaksinimit, ku nga data e vaksinimit të plotë të kenë të paktën dy javë, testin PCR negativ brenda 72 orëve ose testin e shpejtë të antigenit brenda 48 orëve, ose provë të kalimit të infeksionit Sars-Cov-2, të vlefshme deri në 6 muaj pas shërimit. Personat që nuk janë të vaksinuar, mund të udhëtojnë drejt Francës vetëm për arsye të rëndësishme. Fëmijët deri në 12 vjeç nuk u nënshtrohen këtyre rregullave”, njofton aeroporti, transmeton Albinfo.ch.

Ndërsa për pasagjerët që nuk janë rezidentë në Belgjikë duhet të testohen përsëri në ditën e shtatë.

“Të gjithë personat që udhëtojnë nga Tirana International Airport drejt Belgjikës dhe që nuk janë rezidentë në Belgjikë duhet të jenë të pajisur me pasaportën  e vaksinës ose testin PCR, të testohen përsëri në ditën e 7 ose provë të kalimit të infeksionit Sars-Cov2, e vlefshme deri në 6 muaj pas shërimit”, theksohet në njoftim.

“Të gjithë personat që udhëtojnë nga Tirana International Airport drejt Belgjikës dhe janë rezident Belgjikë duhet të testohen në ditën e parë ose të dytë, të testohen përsëri në ditën e 7 ose të paraqesin provë të kalimit të infeksionit Sars-Cov2, e vlefshme deri në 6 muaj pas shërimit”, bën të ditur TIA.