Kurti për forcat serbe në kufi: Gjithçka është nën vëzhgim, jemi gati për çdo befasi

Kryeministri i Kosovës, Albin Kurti, ka folur sot në lidhje me videon e publikuar dje, ku shihen forcat ushtarake serbe pranë kufirit me Kosovën.

Në konferencën e sotme, Kurti ka thënë se sot, për dallim nga dje, ushtarë serbë nuk janë parë në kufi, transmeton albinfo.ch.

“Jam duke e shikuar telefonin vazhdimisht. Deri në orën 16:00 nuk ka asnjë dëshmi që sot janë afruar sërish. Ata i kanë disa ushtrime ushtarake, por ato nuk mbahen 10 metra larg kufirit. Ata po vijnë shumë afër ku nuk ka nevojë as për dron e dylbi për t’u parë me njëri-tjetrin. Nëse duam normalizim të marrëdhënieve, ushtritë duhet të rrinë në kazerma, e jo në kufi, as ushtria, as ushtarët”, ka thënë ai.

Tutje Kurti ka thënë se institucionet e Kosovës janë duke përcjellë kufirin pandërprerë.

“Gjithçka është nën vëzhgim dhe jemi në gjendje gatishmërie për çdo befasi që mund të na ndodhë”, ka shtuar tutje ai.