LDK dhe PDK nuk do të votojnë për kryeparlamentarin më 15 prill

Kur kanë mbetur edhe katër ditë deri më 15 prill, ditën kur pritet të konstituohet Kuvendi i Kosovës, Lëvizja Vetëvendosje nuk i ka numrat për ta votuar kryetarin që propozohet nga vetë ajo.

Të premten, krerët e partive politike që dolën e dyta, respektivisht e treta, thanë se nuk do ta votojnë kandidatin e propozuar nga Lëvizja Vetëvendosje.

“Kushtetuta parasheh që më 15 të konstituohet Kuvendi. Nuk është e thënë që ne patjetër të votojmë. Krejt çka presim është që më 15 të propozohet kryetari i Kuvendit dhe ne të propozojmë nënkryetarët. Pse duhet të jetë problem të votohet kryetari i Kuvendit? Nuk është telashe të bëhen 61 vota. Unë vetëm shpresoj që do të ketë respektim – së pari të vullnetit qytetar, votës së qytetarit dhe Kushtetutës së Kosovës. Të martën, partia e parë duhet të propozojë kryetarin e Kuvendit – kjo është me rëndësi të ndodhë. Në momentin që ndodh kjo, jam i bindur se nuk do të ketë asnjë telashe që të bëhen 61 vota,” ka thënë Memli Krasniqi, kryetar i Partisë Demokratike të Kosovës.

Ndërkohë, kryetari i Lidhjes Demokratike të Kosovës, Lumir Abdixhiku, thotë se partia që ka dalë e para duhet ta krijojë shumicën parlamentare.

“Një kryetar i Kuvendit që nuk i ka 61 vota për vete, nuk duhet të jetë kryetar i Kuvendit të Kosovës në radhë të parë fare. Pra, minimalisht duhet t’i ketë 61 vota, më pas shihemi për gjëra të tjera. E njohim të drejtën e plotë të partisë së parë që të provojë të bëjë shumicën. Nëse jo, pas 15 ditësh, Kushtetuta ia njeh të drejtën secilës parti që dëshmon para Presidentes se mund ta bëjë shumicën, që ta bëjë një gjë të tillë. S’kemi mbërritur në atë pikë. Do të jem transparent kur të mbërrijmë aty,” tha Abdixhiku.