Me rregullat e reja, procedura e azilit, nga 280 është shkurtuar në 50 ditë

Ndërkohë, shkalla e ankesave të bëra nga azilkërkuesit është pak nën 35 për qind, që është vetëm pak më shumë se para se të hynin në fuqi rregullat e reja

Sekretariati Shtetëror për Migracion, SEM, duke bërë bilancin afër njëvjeçar, është shprehur i kënaqur me rregullat e reja lidhur me kërkesat për azil, të cilat kanë hyrë në fuqi një vit më parë.

Me këtë ndryshim, që ka hyrë në fuqi më 1 mars të vitit 2019, procedurat e azilit kanë përfunduar mesatarisht brenda 50 ditësh, shkruan srf.ch, transmeton albinfo.ch. Për të vërejtur ndryshimin, duhet pasur parasysh se këto procedura dikur merrnin mesatarisht 280 ditë, thonë në SEM.

Ndërkohë, shkalla e ankesave të bëra nga azilkërkuesit është pak nën 35 për qind, që është vetëm pak më shumë se para se të hynin në fuqi rregullat e reja.

Sidoqoftë, SEM në konferencüen për shtyp, të mbajtur sot në Bernë, nuk i ka përmendur kritika për procedurat e përshpejtuara, të shprehura nga faktorë tjerë në këtë fushë.

“SEM është duke vepruar nën presion politik dhe ka ambicie të tepruara”, ka kritikuar në një intervistë në «NZZ» këtë javë Agjencia Zvicerane e Refugjatëve (SFH)

Drejtorja e SFH Miriam Behrens, ka thënë se autoritetet e azilit kanë shikuar vetëm ritmin gjatë procesit, përcjell albinfo.ch. Ndërsa cilësia e disa vendimeve të marra është e dobët. Dhe kjo, sipas saj, është arsyeja përse shumë ankesa janë të suksesshme.

---