“Moderna” aplikon për autorizimin e vaksinës

Keystone (Alexander Zemlianichenko Jr/ Russian Direct Investment Fund via AP)

Kompania farmaceutike “Moderna” synon të aplikojë sot në Administratën e Ushqimit dhe Barnave të SHBA-së për autorizimin e vaksinës së saj Covid-19, transmeton albinfo.ch.

Po ashtu, kompania do t’i kërkojë FDA të rishikojë një grup të zgjeruar të të dhënave që tregon se vaksina është 94.1% efektive në parandalimin e Covid-19 dhe 100% efektive në parandalimin e rasteve të rënda të sëmundjes.

“Moderna” do të bëhet kompania e dytë që aplikon në FDA për autorizimin e përdorimit emergjent për një vaksinë kundër koronavirusit. “Pfizer” aplikoi më 20 nëntor me të dhëna që tregojnë njëlloj efikasitet të lartë.

FDA do të takohet me Komitetin këshillimor në dhjetor për të shqyrtuar aplikacionet e “Pfizer” dhe “Moderna”.

Vaksinimet e para në Shtetet e Bashkuara të Amerikës pritet të ndodhin “drejt pjesës së fundit të dhjetorit”, sipas Dr. Anthony Fauci, drejtor i Institutit Kombëtar të Alergjisë dhe Sëmundjeve Infektive.