Një muaj paraburgim personit që kanosi konsullin e Austrisë

Foto ilustrim

Gjykata Themelore në Pejë ka njoftuar se ndaj të dyshuarit A.P. është caktuar masa e paraburgimit, nën dyshimin e arsyeshëm se kishte kanosur një zyrtar në Konsullatën e Austrisë në Pejë, përcjell albinfo.ch.

Sipas njoftimit të Gjykatës, i dyshuari, ndër të tjerash e kishte kërcënuar me fjalët “Unë do ta fshij popullin tuaj nga faqja e dheut nëse ti mendon që ta kundërshtosh presidentin e shtetit”.

“Me datë 06.05.2019, rreth orës 01:26 min, në Pejë, seriozisht kanos të dëmtuarin zyrtarin – Konsullin në Konsulatën e Austrisë në Pejë A.Ҫ., me qëllim të frikësimit ose shkaktimit të ankthit, në atë mënyrë që pasi paraprakisht i pandehuri përmes telefonit të tij i dërgon SMS të dëmtuarit në gjuhën gjermane duke kërkuar nga i njëjti që t’ia sigurojë një dokument udhëtimi dhe mjete materiale me qëllim të udhëtimit për në Austri, e më pas edhe komunikon me të rreth 10 min, pasi që i dëmtuari nuk i përgjigjet, i pandehuri natën kritike përmes Whatsapp-it i dërgon një mesazh kërcënues “Unë do ta fshij popullin tuaj nga faqja e dheut nëse ti mendon që ta kundërshtosh presidentin e shtetit”, thuhet në njoftimin e Gjykatës.

Tutje, nga Gjykata kanë njoftuar se me këto veprime i pandehuri A.P dyshohet se ka kryer veprën penale të kanosjes.  Të pandehurit i është caktuar masa e paraburgimit në kohëzgjatje prej një muaji. Kundër këtij vendimi pala e pakënaqur ka të drejtë ankesë në Gjykatën e Apelit.