Një në 10 vetura në Zvicër lëviz me energji alternative

Nëse në gjashtëmujorin e vitit të kaluar veturat e shitura që ecin me energji alternative përbënin 6.3% të të gjitha veturave, në këtë gjysmëvjetor kemi 10.6% të tilla

Keystone

Në Zvicër është duke vazhduar me të madhe trendi i orientimit drejt automobilave që vihen në lëvizje me lëndë alternative dhe i ikjes nga motorët klasikë me djegie të brendshme, shkruan srf.ch.

Sipas shifrave më të reja të shitjes së veturave për gjysmën e parë të vitit 2019 rezulton se në rrugët e Zvicrës aktualisht çdo i dhjeti automobil lëviz ose me fuqi tërësisht elektrike, ose hibride (elektrik dhe benzinë), apo me gaz natyror ose me hidrogjen.

Në përgjithësi, numri i automjeteve të shitura gjatë këtij gjashtëmujori mbetet stabil në krahasim me periudhën e njëjtë një viti më parë, transmeton albinfo.ch. Siç shkruajnë në një komunikatë për media shoqatat zvicerane për shitje të automjeteve, AGVS  dhe ajo Eurotax, janë shitur gjithsej 157.136 vetura.

Krahasuar me gjysmëvjetorin e kaluar janë shitur 68% më shumë automjete të kësaj kategorie (me energji alternative). Kështu, nëse në gjashtëmujorin e vitit të kaluar veturat e shitura që ecin me energji alternative përbënin 6.3% të të gjitha veturave, në këtë gjysmëvjetor kemi 10.6% të tilla.