Policia shqiptare largon tabelat me mbishkrime në gjuhën greke

Pasi një ditë më parë reagoi partia shqiptare që mbron të drejtat e çamëve PDIU, edhe banorë të jugut të Shqipërisë, policia sot ka zhvilluar një operacion në fshatin Finiq të Sarandës, ku edhe ka larguar tabelat e vendosura edhe në gjuhën greke.

Partia për Drejtësi, Integrim dhe Unitet e quajti provokim të rëndë vendosjen e tabelave rrugore në gjuhën greke në jug të Shqipërisë.

Në një deklaratë për mediat, PDIU akuzoi qeverinë dhe kryeministrin Rama.

“Nëse qeveria shqiptare nuk ndërhyn në kohë, tregon se ka gisht në cenimin e sovranitetit të vendit. Greqishtja është gjuhë e dytë vetëm në Finiq e Dropull dhe atje tabelat duhen fillimisht në gjuhën shqipe, pastaj në greqisht”, thuhej në reagimin e PDIU-së.