Prishtinë: Organizohet protestë për hapjen e rrugës “George Bush”

Foto FB: Vrojtuesit e lagjes - Prishtinë

Qytetarët e kryeqytetit të Kosovës kanë organizuar protestën që pritet të zhvillohet më 14 janar, për shkak të mbylljes së rrugës “George Bush” në Prishtinë.

Përmes njoftimit në rrjetin social “Facebook” u bëhet thirrje qytetarëve t’i bashkohen protestës të organizuar me kërkesën për hapjen e kësaj rruge, ndërsa thuhet se në lidhje me këtë është lajmëruar edhe Policia e Kosovës, përcjell albinfo.ch.

“Pas mbylljes së rrugës, kemi përballur një problem të vazhdueshëm me trafikun dhe kolonat e gjata që kanë shkaktuar ndërprerje në qarkullim. Protesta jonë është e organizuar në mënyrë paqësore dhe e ligjshme për të shprehur nevojën tonë për të hapur këtë rrugë të rëndësishme për qytetarët e lagjes. Data e protestës është 14 janar 2024, ku pritet të mblidhemi në pikën e mbylljes së rrugës ‘George Bush’ në shenjë solidariteti dhe thirrje për veprime. Protesta do të fillojë në orën 12:00 dhe do të mbahet në mënyrë paqësore. Me këtë njoftojmë autoritetet komunale dhe Policinë e Kosovës për protestën tonë paqësore”, thuhet në njoftim.

Ndryshe, rruga “George Bush” është mbyllur në dhjetor të vitit 2022, për qarkullim të automjeteve dhe është kthyer në shesh me vendim të kryetarit të Prishtinës, Përparim Rama.