Qiratë në Zvicër rezultojnë më të përballueshme krahasuar me shumë qytete evropiane

Pavarësisht çmimeve të larta, pagat e larta i bëjnë qytetet zvicerane më të favorshme për qiramarrësit

Edhe pse Zvicra njihet për qiratë e larta, një analizë ndërkombëtare tregon se banesat në qytetet zvicerane janë më të përballueshme krahasuar me shumë metropole të mëdha evropiane kur llogariten në raport me pagat, transmeton albinfo.ch.

Studimi i publikuar nga portali financiar Tradingpedia analizoi 127 qytete në mbarë botën dhe arriti në përfundimin se qytetet zvicerane “dallohen si vende të mira për të jetuar me qira bazuar në pagat lokale”, pavarësisht se kanë ndër qiratë më të shtrenjta në Evropë.

Në Cyrih, një nga qytetet më të shtrenjta në botë, qiraja mesatare mujore kalon 2,380 franga zvicerane — niveli më i lartë mes qyteteve të analizuara. Megjithatë, paga mesatare neto prej rreth 6,790 frangash bën që banorëve t’u mbeten afërsisht 65% e të ardhurave edhe pas pagesës së qirasë.

Sipas analizës, qytete të tjera zvicerane si Bazel, Bern dhe Lozanë rezultojnë edhe më të favorshme sa i përket raportit mes qirasë dhe të ardhurave.

Studimi thekson se në shumë qytete të mëdha evropiane, edhe pse qiratë janë më të ulëta në vlerë absolute, pagat janë dukshëm më të vogla, duke e bërë barrën reale të qirasë më të rëndë për banorët.

---