Bota

Radhë të gjata për të ndihmuar të mbijetuarit e sulmit në Shri Lankë

Të paktën 137 persona kanë humbur jetën dhe qindra të tjerë janë plagosur nga shpërthimet që ndodhën në kishat dhe hotelet e Shri Lankës, kanë njoftuar nga policia dhe spitalet.

Shangri-La, Kingsbury, Cinnamon Grand dhe një hotel i katërt, të gjithë në Colombo, po ashtu u goditën nga shpërthimi, shkruan bbc, përcjell në shqip albinfo.ch. Deri më tani asnjë grup nuk ka marrë përgjegjësi për sulmin.

Ndërkaq, kisha e Shën Sebastianit është dëmtuar rëndë, sipas fotografive të shpërndara në rrjetet sociale. Raportohet se të paktën 67 persona vdiqën aty.

Po ashtu, ka pasur viktima dhe dëmtime të rënda në kishën e Shën Antonit, vendi ku ndodhi sulmi i parë.

Në mesin e të vrarëve në Kolombo, sipas të dhënave nga spitalet, thuhet se janë nëntë shtetas të huaj. Kurse burimet spitalore të Batticaola-s thonë se 27 persona vdiqën në spital.

Ndërkohë është raportuar se ka ndodhur edhe një shpërthim i tetë, që dyshohet se ka qenë sulm vetëvrasës, që shkaktoi të paktën tri viktima.

Tashmë në Shri Lankë ka filluar një mobilizim për të ndihmuar të mbijetuarit.

Një banor i Colombo-s, Usman Ali, i ka thënë BBC-së se pati radhë të gjata të njerëzve që donin të dhuronin gjak për të mbijetuarit.

“Të gjithë kishin vetëm një qëllim: të ndihmonin viktimat e mbijetuara nga shpërthimi, pa marrë parasysh se të cilës fe apo race mund të jenë”, citohet të ketë thënë Ali, përcjell albinfo.ch.