Rama: 11 milionë euro për rilindjen e zonës historike të Vlorës

Keystone

“Vlora është qyteti i radhës, qendra historike e së cilës do të rilindë pas një harrese shumëvjeçare”.

Kështu ka thënë kryeministri i Shqipërisë, Edi Rama, i cili ka marrë pjesë në nisjen e projektit për restaurimin dhe rikualifikimin urban të saj, përcjell albinfo.ch.

Projekti, me vlerë prej 11 milionë eurosh, është konceptuar sipas të njëjtit model, me të cilin është punuar për rijetëzimin e Pazarit të Korçës, të Krujës, Gjirokastrës.

Rama ka thënë se nuk bëhet fjalë thjesht për restaurim, por për një transformim të zonës.

“Qyteti ka arritur me vështirësi të trashëgojë disa gjurmë të trashëgimisë së vet. Dhe pse disa banesa të vjetra janë shkatërruar tërësisht dhe janë ndërtuar të reja, madje në disa raste janë shkatërruar monumente, vlerësojmë se ka një potencial për një tjetër impuls të rëndësishëm në funksion të ruajtjes së vlerave të mbetura, por dhe një impuls në funksion të zhvillimit të ekonomisë së qytetit dhe turizmit”, ka thënë Rama.