Lajme

Vendet më të korruptuara në botë, ja ku renditen Kosova dhe Shqipëria

Shqipëria dhe Kosova përkeqësohen në luftën kundër korrupsionit

Organizata ndërkombëtare ‘Transparency International’ ka publikuar Indeksin e Perceptimit të Korrupsionit për vitin 2019, në të cilin paraqitet se mbi dy të tretat e vendeve janë duke stagnuar në përpjekjet antikorrupsion, përcjell albinfo.ch.

Indeksi i Perceptimit të Korrupsionit ka renditur 180 vende, duke filluar nga ato me korrupsionin më të ulët dëri tek ato me korrupsionin më të lartë.

Renditja u bë në bazë të perceptimit mbi korrupsionin në sektorin publik, sipas ekspertëve dhe njerëzve të biznesit. Analiza e këtij viti tregon se korrupsioni është më i përhapur në vendet ku paratë e mëdha mund të rrjedhin lirshëm në fushatat elektorale dhe ku qeveritë dëgjojnë vetëm zërat e individëve të pasur.

Në vendin e parë renditet Zelanda e Re, si vendi më pak i korruptuar në botë. Pas saj renditet Danimarka dhe Finlanda. Shqipëria renditet në vendin e 106-të dhe bashkë me Maqedoninë e Veriut kanë renditjen më të dobët se vendet e tjera të Ballkanit.

Kosova renditet në vendin e 101-të, ndërsa Mali i Zi në vendin e 66-të. Në fund të tabelës renditet Somalia, si vendi me korrupsionin më të lartë në botë.

Vlen për t’u theksuar që Shtetet e Bashkuara të Amerikës nuk janë as në 20-shen e parë, duke u renditur në vendin e 23-të. /Albinfo.ch.