Rënie e madhe e numrit të shqiptarëve të dëbuar

Vitin e kaluar, më së shumti të dëbuar kishte me shtetësi shqiptare, 451 sish. Pas tyre, me 313 vinin kosovarët. Gjatë gjysmës së parë të këtij viti janë dëbuar vetëm 105 shtetas shqiptarë

Numri i azilkërkuesve të dëbuar nga landi (republika) gjerman Hessen ka rënë ndjeshëm gjatë gjysmës së parë të këtij viti. Kjo thuhet në përgjigjen që ministri i brendshëm Peter Beuth i ka dhënë një pyetjeje të të majtës në Parlamentin e landit, shkruan fr.de.

Sipas tij, gjatë gjithë vitit 2016 nga ky land qenë dëbuar në vendin e prejardhjes ose në vendin ku kanë kërkuar së pari azil, 1717 veta. Ndërsa në gjashtë muajt e parë të këtij viti kanë qebë vetëm 564 sish, transmeton albinfo.ch. Ndryshimi tjetër në mes të këtyre dy periudhave ka të bëjë me shtetësinë e të huajve të dëbuar.

Vitin e kaluar kanë qenë refugjatët nga Ballkani ata që janë dëbuar më shumë. Listës i prinin shtetasit shqiptarë me 451 dëbime ndërsa menjëherë pas tyre, me 313 të dëbuar, vinin kosovarët. Shtetasit e Serbisë zinin vendin e tretë në këtë listë. Ndërkohë, në gjashtë muajt e parë të këtij viti janë dëbuar 105 shtetas shqiptarë, që është numër më i madh se ai i shtetasve të vendeve tjera. Algjerianët, me 71, vijnë në vendin e dytë.