Gastronomët shqiptarë në Zvicër

Restoranti italian shndërrohet në restorant me ushqime të kuzhinës shqiptare

Restoranti italian“JetSet” në Kloten të Zürichut, do të shndërrohet në restorant me ushqime të kuzhinës shqiptare.

Pronarët shqiptarë kanë premtuar cilësi të lartë, pritje të ngrohtë familjare dhe ambient të traditës shqiptare.

Në restorantin e tyre “JetSet” në Klloten, shumë afër Aeroportit të Cyrihut,  Hetem Nrecaj dhe Jetmir Shabanaj kanë përuruar zyrtarisht të shtunën kuzhinën me specialitete shqiptare.

“Synim imi ka qenë që kuzhinën shqiptare ta prezantoj ashtu si është, pa e përzier fare me ushqime të tjera”, thotë për albinfo.ch Hetem Nrecaj, teksa shfleton menynë që i ka shtuar restorantit të tij, të identifikuar më parë, kryesisht me kuzhinën italiane.

Fakti se në restorant vazhdojnë të vijnë edhe klientë të rregullt zviceranë e të tjerë për shkak të afërsisë me Aeroportin e Cyrihut, e bën edhe më të qëlluar përcaktimin e tyre që të sjellin ushqimet e kuzhinës shqiptare.

Nrecaj tha se kanë vendosur të ruajnë traditën shqiptare të gatimit dhe ta promovojnë te banorët vendës.

Sido që të jetë, kohët e fundit gjithnjë e më shumë po hapen restorante në Zvicër me menu tërësisht shqiptare, si duket ka kaluar koha kur pronarë restorantesh kishin frikë se do të zbulohet përkatësia e tyre shqiptare…!

 


LAJME INTERESANTE NGA INTERNETI