Robert Elsie do të varroset në Shqipëri

Albanologu, studiuesi dhe përkthyesi i njohur, kanadezi me origjinë gjermane, Robert Elsie, i cili u nda nga jeta në moshën 67-vjeçare pak ditë më parë do të prehet në Shqipëri, njoftojnë mediat shqiptare.

Biblioteka Kombëtare e Shqipërisë ka njoftuar se në përmbushje të amanetit të fundit të albanologut të shquar, Robert Elsie për t’u varrosur në Alpet Shqiptare, trupi i tij do të qëndrojë nesër, me datë 17 tetor, në mjediset e Bibliotekës Kombëtare për homazhet dhe nderimet e fundit, nga ora 14:00 deri më 16:00, kur edhe do të zhvillohet ceremonia e përcjelljes për në Shkodër, përcjell albinfo.ch.

Robert Elsie do të prehet me kostum popullor shqiptar, shkruan “Balkanweb”. Disa ditë më parë, fotografi Roland Tasho i ka dërguar familjes së tij një kostum të zonës së Shkodrës, me të cilin është veshur trupi i pajetë i albanologut. Ai do të prehet në Theth, ashtu siç edhe e ka lënë amanet albanologu.

Varrimi i tij është planifikuar të mërkurën nga ora 14:00.