Shanset për azil janë zero

Vazhdon numri i të riatdhesuarve në Shqipëri, pasi gjasat për azil janë zero. Së fundi janë kthyer 36 shtetas shqiptarë pasi iu ishte refuzuar kërkesa për azil në Francë e Belgjikë.

Zëvendësministrja e Brendshme e Shqipërisë, Romina Kuko u bëri thirrje të gjithë shqiptarëve që të mos tentojnë të largohen, pasi shanset për azil janë zero.

“Riatdhesimi i shtetasve azilkërkues në vendet e BE-së, dëshmon edhe një herë angazhimin e Qeverisë shqiptare dhe Policisë së Shtetit, për të trajtuar të gjitha rastet e riatdhesimit për azil, dhe gjithashtu është edhe një thirrje për qytetarët shqiptarë, të cilët nuk duhet të marrin iniciativa kërkim azili, pasi do të rezultojnë të pasuksesshme. Policia e Shtetit ka marrë masa shtesë për kontrollin e të gjitha pikave të kalimit kufitar, për parandalimin e këtyre rasteve. Kjo është një thirrje ndaj gjithë shqiptarëve të cilët tentojnë të kërkojnë azil, për t’ju thënë që shanset e tyre janë zero”, ka thënë ajo, shkruan ‘Scan’.

Ndërkohë, drejtoresha e Departamentit për Kufirin dhe Migracionin, Aida Hajnaj theksoi se duke iu referuar statistikave, numri i shtetasve që kërkojnë azil në vendet e BE-së, është në ulje të vazhdueshme, përcjell albinfo.ch.

“Duke filluar që nga 1 gushti i vitit 2017, datë në të cilën filloi edhe zbatimi i këtyre masave, trendi i shtetasve që kanë kërkuar azil në vendet e BE-së ose në Schengen është në ulje. Janë ndaluar gjithsej 7 315 shtetas shqiptarë. Nga këta, janë 6 630 shtetas të rritur dhe 682 janë minorenë, kjo për periudhën gusht deri në tetor. Të gjithë shtetasit që thyejnë rregullat e Schengenit, do të kthehen dhe nuk kanë shansin për të përfituar azil në vendet e BE-së ose në Schengen”, theksoi ajo.