Shqipëria

Shqipëria në tensione politike nga veriu në jug

Shqipëria po përjeton tensione politike nga veriu në jug, ndërsa zgjedhjet vendore të 30 qershorit po afrohen në kushtet kur presidenti ka deklaruar anulimin e tyre, ndërsa Qeveria kërkon të votohet me çdo kusht më 30 qershor.

Prej rreth 48 orësh në të gjitha bashkitë ku qeveris opozita në Shqipëri ka pasur tensione e në disa raste përleshje mes policisë bashkiake e asaj të rendit për shkak të qendrave të votimit apo, siç njihen, KZAZ-ve, shkruan sot Koha Ditore.

Bashkitë e djathta kërkojnë lirimin e ambienteve që administrohen prej tyre në zbatim të dekretit të presidentit, nga ana tjetër policia mbron këto ambiente me urdhër nga Qeveria.

Ndërkohë që mazhoranca ka bërë gati Ligjin për ashpërsim të Kodit Penal për krimet zgjedhore, i cili pritet të miratohet në seancën parlamentare të së enjtes (sot).

Sipas nismës së miratuar nga komisioni, të gjithë personat që do të kryejnë krime zgjedhore, duke cenuar zgjedhjet dhe sistemin demokratik, nuk do të shkelin dot jashtë territorit të Shqipërisë për 5-10 vjet.

Pas ngjarjeve të regjistruara të martën dhe të mërkurën në bashkitë që drejtohen nga opozita në Shqipëri ka reaguar edhe prezenca e OSBE-së në Tiranë, shkruan KTV, përcjell Albinfo.ch.

“Prezenca e OSBE-së i dënon me forcë sulmet e dhunshme të këtyre ditëve kundër organeve përgjegjëse për organizimin e zgjedhjeve, në disa bashki në Shqipëri. Të gjitha proceset politike dhe administrative duhet të zhvillohen në përputhje me parimet e shtetit ligjor. Çdo përpjekje për të nxjerrë nga shinat procesin demokratik, përmes veprimeve të dhunshme, përbën shkelje të ligjit, pengon përparimin e vendit dhe njollos reputacionin e tij ndërkombëtar. Jo vetëm autorët e dhunës, por edhe nxitësit e saj duhet të mbajnë përgjegjësi ligjore. Ne bëjmë thirrje që autoritetet shtetërore të ndërmarrin të gjitha masat, sipas legjislacionit në fuqi, për të hetuar dhe ndjekur penalisht përgjegjësit e dhunës. Gjithashtu, u bëjmë thirrje organizuesve të protestës së të premtes të sigurojnë një protestë paqësore. Në përputhje me mandatin e saj, prezenca e OSBE-së mbetet e gatshme t’i mbështesë shtetin ligjor dhe demokracinë në Shqipëri”, thuhet në deklaratën e shpërndarë nga prezenca e OSBE-së në Shqipëri.

Edhe kryeministri Edi Rama ka reaguar për zhvillimet e fundit në Shqipëri. Ai e cilëson gjithçka të parashikuar, duke e quajtur aksionin e opozitës nëpër KZAZ “revolucion imagjinar me punonjësit e bashkive blu”.