Lajme

Shtetasja angleze dënohet me 3 vjet burgim për dëshmi të rreme për mërgimtarin shqiptar

Raportohet se një 26-vjeçare, shtetase angleze, e vendosur në Kathalo në ishullin Kos në Greqi, është dënuar nga gjykata e Rodosit për dëshmi të rreme ndaj një 21-vjeçari shqiptar dhe një 23- vjeçari grek, njofton albinfo.ch.

Thuhet se çështja nisi më 30 korrik 2017, kur 26-vjeçarja pretendoi se dy burrat e përdhunuan në një dhomë prapa një restoranti.

Në vazhdën e ngjarjeve, menjëherë pas akuzës që kishte ngritur anglezja, i riu shqiptar dhe ai grek u përfshin në kalvar arrestimesh dhe hetimesh që zgjatën gati pesë vjet.

Këto ditë, gjykata në Rodos zbuloi të vërtetën: E gjitha ishte një mashtrim, anglezja kishte gënjyer, duke dhënë version të rremë të asaj që kishte ndodhur.

Hetimi provoi se nuk kishte gjurmë dhune dhe asnjë provë tjetër që të mbështeste se ajo ishte përdhunuar.

Në këto kushte gjykata e shpalli fajtore angleze dhe e dënoi me 3 vjet burgim. Ndërsa shpalli të pafajshëm të riun shqiptar dhe atë grek. /Albinfo.ch