Shtyhet vendimi për ish-krerët e UÇK-së, aktgjykimi pritet më 20 korrik 2026

Është shtyrë për më 20 korrik 2026 shpallja e vendimit përfundimtar në rastin gjyqësor ndaj ish-krerëve të Ushtrisë Çlirimtare të Kosovës në Dhomat e Specializuara në Hagë.

Shtyrjen e ka konfirmuar për RTK avokati i ish-presidentit Hashim Thaçi, Luka Mishetiq, i cili tha se informacioni i raportuar në media është i saktë.

“Mund të konfirmoj se kjo është e saktë”, është shprehur Mishetiq në përgjigje për RTK lidhur me shtyrjen e datës së shpalljes së aktgjykimit.

Fillimisht, vendimi ishte paraparë të jepet më 19 maj, brenda afateve procedurale. Megjithatë, sipas rregullave të Gjykatës Speciale, trupi gjykues ka deri në 90 ditë për shpalljen e verdiktit, me mundësi shtyrjeje edhe deri në 60 ditë shtesë.

Kështu, vendimi për një nga proceset më të rëndësishme gjyqësore ndaj ish-drejtuesve të UÇK-së tani pritet të bëhet publik më 20 korrik 2026.