Lajme

S’ka marrëveshje në takimin Kurti – Mustafa

Ka përfunduar takimi në mes të liderëve të VV-së dhe LDK-së, mirëpo nuk është arritur marrëveshja për koalicionin

Pas takimit ka folur para mediave lideri i VV-së, Albin Kurti, derisa i njëjti deklaroi se do të vazhdojë të qëndrojë në kontakt me të parin e LDK-së, Isa Mustafa.

“Kur ta kemi marrëveshjen e plotë, do të mund ta shpalosim gjerë e gjatë, përfundoi takimi i sotëm dhe unë jam në kontakt të drejtpërdrejtë me kryetarin e LDK-së që ta përcaktojmë takimin e radhës sa i përket ditës dhe orës që të vazhdojmë më tutje drejt marrëveshjes”, ka shtuar ai.

Lideri i LDK-së, Isa Mustafa, pas takimit me Kurtin tha se patën një takim përmbajtjesore, mirëpo, që nuk u dakorduan në disa çështje. Ai konfirmoi se me VV-në kanë dallime.

“Ne patëm një bisedë mjaft përmbajtjesore, sepse pa biseda të tilla është e vështirë të arrihet një bashkëpunim i ardhshëm, i qëndrueshëm katërvjeçar, natyrisht se ne kemi pasur pajtueshmëri sa i përket programit qeverisës, kemi edhe çështje të tjera që i kemi diskutuar sot, për të cilat do të punojmë për të arritur përafrim. Sot nuk ka marrëveshje për koalicionin, ka marrëveshje që të punojmë e të hulumtojmë rrugë që të përafrohemi në qëndrimet tona. Dallimet tona do t’ jua tregojmë kur t’i përafrojmë”, ka thënë ai, shkruan GE, përcjell albinfo.ch.