Pas shumë paralajmërimeve të bëra në këtë drejtim, SVP e ka bërë realitet: kryesia e partisë konservative zvicerane sot është shprehur njëzëri pro iniciativës për “rrëzimin” e marrëveshjes për lëvizje të lirë me Bashkimin Evropian.

Njoftimin për këtë vendim e ka bërë për publikun pak minuta më parë partia SVP/UDC, shkruan srf.ch.

Iniciativa ndryshe quhet edhe “iniciativa e distancimit” ndërsa zyrtarisht “Për një migrim me masë”, transmeton albinfo.ch. Nëse ajo do të arrijë të marrë votat e shumicës së votuesve në referendum, atëherë Këshilli Federal (qeveria e vendit) do të detyrohet të rinegociojë lëvizjen e lirë me BE-së.

Aktualisht, teksti i iniciativës është në shqyrtim në Kancelarinë Federale, zyrën kompetente për pranimin dhe vlerësimin e iniciativave popullore. Pas kësaj, SVP do të fillojë me grumbullimin e nënshkrimeve të nevojshme për vlefshmërinë e iniciativës.