Vala e të nxehtit mund të rrisë çmimet e ushqimeve në Zvicër

Thatësira dhe mungesa e ujit po dëmtojnë prodhimet bujqësore, ndërsa supermarketet paralajmërojnë se konsumatorët mund të përballen me çmime më të larta

Vala e fuqishme e të nxehtit dhe thatësira që kanë përfshirë Zvicrën gjatë javëve të fundit mund të ndikojnë drejtpërdrejt në çmimet e ushqimeve, veçanërisht të perimeve të kultivuara në fusha të hapura.

Temperaturat kanë arritur deri në 39 gradë Celsius në Bazel dhe mbi 35 gradë në disa rajone të tjera të vendit, duke prekur jo vetëm shëndetin e popullsisë dhe infrastrukturën, por edhe sektorin e bujqësisë, shkruan The Local, transmeton albinfo.ch.

Kulturat bujqësore kanë nevojë për ujitje të rregullt gjatë verës, por furnizimi me ujë po bëhet gjithnjë e më i kufizuar në disa zona. Për shkak të mungesës së reshjeve, autoritetet lokale kanë nisur kufizimin dhe racionalizimin e përdorimit të ujit, duke e bërë situatën edhe më të vështirë për fermerët.

Sipas përfaqësuesve të rrjetit të supermarketeve Coop, vështirësitë në fusha mund të reflektohen edhe në portofolin e konsumatorëve. Ndër produktet më të rrezikuara janë patatet, sallata e gjelbër, lulelakra, brokoli dhe finoku, të cilat janë veçanërisht të ndjeshme ndaj temperaturave jashtëzakonisht të larta.

Edhe Migros e ka cilësuar situatën si të tensionuar, duke paralajmëruar se pasojat e valës së të nxehtit mund të sjellin rritje të çmimeve gjatë javëve të ardhshme. Megjithatë, niveli i saktë i dëmeve dhe ndikimi në korrje nuk mund të përcaktohen plotësisht para muajve gusht ose shtator.

Një zhvillim pozitiv është se sëmundjet kërpudhore dhe dëmtuesit e tjerë të kulturave kanë mbetur deri tani relativisht të kufizuar, çka mund të zvogëlojë një pjesë të humbjeve.

Coop dhe Migros kanë përgatitur plane alternative në rast se prodhimi vendor nuk arrin t’i plotësojë nevojat e tregut. Të dyja kompanitë favorizojnë produktet vendore, por mund të detyrohen të rrisin importet nëse kushtet e motit nuk përmirësohen.

Megjithatë, pasi vala e të nxehtit dhe thatësira po prekin edhe shumë vende të tjera evropiane, importet mund të duhet të sigurohen nga tregje më të largëta. Kjo do të sillte kosto më të larta transporti dhe mund të ushtronte presion shtesë mbi çmimet që paguajnë konsumatorët në Zvicër.

---