Kosova

VV-ja paralajmëron protesta

Më 29 shtator Lëvizja Vetëvendosje do të protestoj në Prishtinë kundër idesë së ndryshimit të kufijve dhe bisedimeve me Serbinë, të udhëhequra nga presidenti Hashim Thaçi.

“Ne i kemi institucionet e shtetit të kapura. Sheshi është institucion në Republikë. Pakënaqësia duhet të dalë në shesh. I ftojmë qytetarët e të gjitha moshave e vendbanimeve, anëtarët e të gjitha partive dhe organizatave të bashkohen në protestë. Një popull s’i nënshtrohet një njeriu”, ka thënë kryetari i Vetëvendosjes, Albin Kurti, i cili ka shtuar se protesta do të jetë e qetë, përcjell albinfo.ch.

I pyetur nëse do të bashkohet edhe LDK-ja në protestë, Kurti ka thënë se kanë pasur komunikim, por përshtypja e tij është se kjo parti më shumë ka interesim se gatishmëri që të bashkohet në protestë. Protesta të shtunën tjetër nis në orën 14.

Gjykata e Apelit vërteton dënimin ndaj Kurtit e deputetëve të tjerë për gazin

Gjykata e Apelit e ka vërtetuar dënimin për deputetët e Kuvendit të Kosovës që u dënuan për gjuajtje të gazit lotsjellës në Kuvend. Gjykata ka vërtetuar dënimin për Albin Kurtin, Albulena Haxhiun, Donika Kadaj – Bujupin dhe Faton Topallin. Kurti u dënua nga shkalla e parë me 1 vit e 6 muaj burgim me kusht, njëjtë sikurse Donika Kadaj – Bujupi, kurse Albulena Haxhiu është dënuar me 1 vit e 3 muaj burgim dhe Faton Topalli me 1 vit e 2 muaj burgim.

Këto dënime nuk do të ekzekutohen brenda 2 vjetësh, nëse të dënuarit nuk kryejnë një vepër tjetër penale brenda kësaj periudhe. “Gjykata e Apelit konstaton se aktgjykimi në fjalë nuk është i përfshirë me shkelje esenciale të dispozitave të procedurës penale, gjendja faktike është vërtetuar drejt dhe në mënyrë të plotë dhe se nuk përmban as shkelje të Ligjit Penal, e që do të kushtëzonte anulimin e aktgjykimit”, thuhet në njoftimin e Gjykatës.