Zemaj: Shpejt do të kemi edhe strategjinë e testimit

Facebook

Ministri i Shëndetësisë, Armend Zemaj, gjatë ditës së sotme ka vizituar Klinikën Infektive të QKUK-së. Ai ka thënë se bashkë me drejtorin e SHSUK-së dhe stafin e Klinikës Infektive kanë diskutuar për hapat e ardhshëm për parandalimin e COVID-19.
“Sot vizitova Kliniken Infektive të QKUK-së. Bashkë me drejtorin e SHSUK-së dhe stafin e Klinikës u dakorduam për hapat e ardhshëm në përpjekjet tona institucionale për të parandaluar përhapjen e koronavirusit”, ka shkruar Zemaj.
Ministri thotë se Qeveria Hoti do të jetë afër qytetarëve dhe ka paralajmëruar një strategji për testimin e të infektuarve potencialë.
“Si ministër dhe si Qeveri e Kosovës zotohemi se do të jemi afër në çdo kohë. Për të kaluar sa më lehtë kjo gjendje e pandemisë, shumë shpejt do të kemi edhe strategjinë e testimit dhe avancimin e shërbimeve shëndetësore në gjithë Kosovën”, ka shtuar ai, përcjell Albinfo.ch.