Lajme

7 makina patrullimi ndjekin dy kosovarë që kishin vjedhur biçikleta të shtrenjta

Në pikën kufitare Sasbach/Marckolsheim ka përfunduar ikja e 19 dhe 24-vjeçarit, të cilët sipas policisë vijnë nga Kosova

E diel, 7 Gusht 2022 - 23:10 albinfo.ch

Keystone

Të shtunën pasdite, dy persona të dyshuar si hajdutë të biçikletave kanë shkaktuar një ndjekje spektakolare me deri shtatë makina patrullimi nga lugina Kinzig në Kaiserstuhl, Landi gjerman Baden Württemberg, transmeton albinfo.ch.

Në pikën kufitare me Francën, në Sasbach/Marckolsheim ka përfunduar ikja e 19 dhe 24-vjeçarit, të cilët sipas policisë vijnë nga Kosova.

Dëshmitarët kishin parë se si dy persona po ngarkonin biçikleta në një furgon me targa franceze afër pishinave në Haslach dhe Steinach, shkruan badische-zeitung.de.

Si rezultat, policia e ka gjetur dhe e ka ndjekur automjetin në fjalë, përcjell albinfo.ch. Por fillimisht ajo nuk ishte në gjendje ta ndalonte atë – madje as me pengesën e vendosur me gozhda në rrugë.

Kur furgoni ju qe afruar dy policëve, ata kanë qëlluar me armë drejt gomave. Kështu, arratisja përfundoi shpejt. Në automjet ndodheshin gjashtë biçikleta të shtrenjta të vjedhura.