Dren Feka, talenti shqiptar i bundesligës gjermane

Është shkruar se, të interesuara për shërbimet e Drenit janë edhe skuadrat: Bremen dhe Lisabon. Po ashtu është thënë se dy vite më parë Dreni ka marrë edhe një ofertë nga skuadra më e madhe gjermane, Bajern Munih

Dren Feka

Në serinë e talenteve të futbollit në Gjermani, gazeta Bild,  ka portretizuar sot një futbollist me prejardhje shqiptare. Bëhet fjalë për 18 vjeçarin Dren Feka i cili aktualisht luan për ekipin e dytë të SV Hamburgut dhe konsiderohet si një nga talentet defansiv për të ardhmen e futbollit në Gjermani.

Djaloshi vushtrrias javë më parë ka nënshkruar edhe kontratën e parë profesionale me HSV dhe shumë shpejt ai do të jetë një alternativë edhe për ekipin e parë të Hamburgut, njofton “albinfo.ch”

Talenti shqiptar Dren Feka në këtë sezon ka luajtur për ekipin e dytë të Hamburgut, ndërsa pak ditë para Krishtlindjes ka nënshkruar kontratë profesionale deri në vitin 2018. Përveç klubit aktual, edhe disa klube të tjera janë duke e përcjell Fekën. Gazeta gjermane “Bild” ka shkruar se të interesuara për shërbimet e Drenit janë edhe skuadrat: Bremen dhe Lisabon.

Po ashtu është thënë se dy vite më parë Dreni ka marrë edhe një ofertë nga skuadra më e madhe gjermane, Bajern Munih.

“Kam pasur oferta nga jashtë ku kam mundur të fitoj edhe shuma të mëdha parash. Por unë jam i gëzuar që mund të qëndroj në HSV. Unë kam luajtur gjatë tërë vitit këtu dhe këtë ekip e kam në zemër”, ka thënë Feka për “Bild”, pas vazhdimit të kontratës, përcjell “albinfo.ch”.

Dren Feka që nga viti 2009 ka kaluar në ekipe të ndryshme tek të rinjtë e HSV dhe që herët ka treguar se është një talent i madh. Futbollisti shqiptaro – gjerman ka luajtur për U15 të kombëtares gjermane dhe që prej atëherë ai ka luajtur nëpër grup mosha të ndryshme. Në vitin 2013, si 15 vjeçar ai luajti tri ndeshje për kombëtaren shqiptare për U17. Në vitin 2015 u ftua për të luajtur edhe një ndeshje miqësore për përfaqësuesen e Kosovës.

Gjatë verës në Telekom Cup 2015 ai ishte pjesë e rregullt e ushtrimeve me futbollistët profesionistë të Hamburgut. Në shtator u nderua me çmimin e vitit si “Talenti më i ri i futbollit” për klubin e Hamburgut të Gjermanisë.

Këmbëmajti deri më tash për të rinjtë e Hamburgut ka luajtur si mesfushor defansiv dhe si mbrojtës i majtë.

Dreni është i gjatë 1.83 centimetër dhe shihet si një lojtar shumë cilësor dhe me të ardhme të sigurt. Ai shpreson që në sezonin e dytë të fitojë shansin për të luajtur për ekipin e parë. “I kam thënë trajnerit, që unë jam i gatshëm”, ka potencuar futbollisti i ri.