2016-a nis me tri viktima në trafik

Tre qytetarë kanë humbur jetën në Shqipëri në komunikacion, në mesin e tyre një polic, ndërsa në Kosovë 17 veta janë lënduar nga mjetet piroteknike

Të paktën tre qytetarë kanë vdekur dhe katër të tjerë janë lënduar në aksidente të ndara në Republikën e Shqipërisë, në prag të ndërrimit të moteve. Pas mesnatës ka humbur jetën një 17-vjeçar, i cili po udhëtonte me një motoçikletë në aksin Fier-Shegan, ndërsa në Pogradec një tjetër i ri ka humbur jetën pasi makina “Mercedes Benz” ka dalë nga rruga.

Në Tiranë, po ashtu në rrethrrotullimin e Saukut, ka humbur jetën një punonjës policie që është përplasur nga një automjet, kurse një aksident tjetër automobilistik ka ndodhur në Shkodër, në vendin e quajtur kryqëzimi i Dajçit, ku për pasojë 4 të rinj janë plagosur rëndë.

Këto viktima e kanë zbehur festën e vitit të ri në Shqipëri.

Ndërsa në Kosovë, nuk është raportuar për viktima, derisa Policia e Kosovës tregon për 17 të lënduar nga mjetet piroteknike. Sipas medieve në Prishtinë, janë 17 qytetarë që kanë kërkuar ndihë nga emergjenca mjekësore, pasi janë lënduar gjatë ndezjes së mjeteve piroteknike. Shumica prej të lënduarve kanë qenë fëmijë.