Mjegull në Kosovë, anulohen katër fluturime

Sipas njoftimeve nga Aeroporti Ndërkombëtar i Prishtinës “Adem Jashari”, për shkak të mjegullës së dendur, janë anuluar disa fluturime, në mesin e tyre edhe një për Cyrih

Ngitja e temperaturave sërish ka kthyer në Kosovë mjegullën e dendur e cila ka krijuar vështirësi në komunikacion. Po ashtu, sipas njoftimeve nga Aeroporti ndërkombëtar i Prishtinës “Adem Jashari”, për shkak të mjegullës janë anuluar disa fluturime, në mesin e tyre edhe për Cyrih.

Sipas njoftimeve, ardhjet nga Lubjana në orën 14:45 dhe nga Cyrihu i paraparë për orën 15:30 janë anuluar. Po ashtu dy fluturime tjera nga Prishtina për në Shtutgard dhe Lubjanë janë anuluar, raporton Koha. Fluturimi për në Lubjanë ishte paraparë për orën 15:15, transmeton albinfo.ch.

Gjatë ditëve të shkuara, Kosova dhe rajoni i Ballkanit u përballa me temperatura të ulëta “siberiane”, që shkuan deri minus 20 gradë. Ndërsa gjatë kësaj jave, meteorologët kanë parashikuar ngritje të temperaturave, që të shkojnë deri 13 gradë. Kjo ka shkaktuar edhe mjegull të dendur në Rrafshin e Kosovës.