Zyrtarit të LDK-së i digjet vetura Passat

Persona të panjohur për Policinë, ia kanë vënë flakën veturës së shefit të grupit parlamentar të Lidhjes Demokratike të Kosovës (LDK), Ismet Beqirit. Vetura është djegur krejtësisht

Në orët e para të mëngjesit, persona të panjohur për Policinë, ia kanë vënë flakën veturës së shefit të grupit parlamentar të Lidhjes Demokratike të Kosovës (LDK), Ismet Beqirit. Vetura është djegur krejtësisht, edhe pse ekipet e zjarrfikësve kanë arritur në vendin e ngjarjes, duke u munduar ta lokalizojnë zjarrin.

Vetura e tipit Passat ka qenë e parkuar para banesës së Beqirit në Prishtinë. Besohej se djegia është bërë me benzinë, raporton Insajderi.

Zjarrfikësit dhe Policia e Kosovës kanë dalë në vendin e ngjarjes për të kryer hetime.

Vetë Beqiri ka thënë për KP, se ky rast, por edhe rastet e tjera që kanë ndodhur më herët janë akte banditësh.

“Fatkeqësisht ky sigurisht është një akt i banditëve … dhe përkundër kësaj askush nuk mund të na ndalë në punën tonë institucionale për të mirën e vendit dhe nuk është e imja të paragjykoj, por vërtet organet e drejtësisë duhet t’i zbardhin këto raste sepse nuk është rasti i parë. Qytetarët po shqetësohen sepse po rrezikohet jeta e tyre, se realisht unë banoj në një vend ku ka edhe shumë banorë të tjerë”, tha Beqiri.

Ndezja e veturave të politikanëve, kryesisht këtyre të koalicionit qeverisës është shpeshtuar ditëve të fundit. Brenda dy javësh është djegur vetura e familjes së ministrit të Bujqësisë, Memli Krasniqi, zëvendësministrit të Administratës Publike, Bajram Gecaj dhe është tentuar ti digjet vetura e shefit të grupit parlamentar të Partisë Demokratike të Kosovës (PDK), Adem Grabovci.

Për  këto veprime, deri më tani nuk është arrestuar asnjë qytetarë. Të atakuarit e mëhershëm kanë ngritur gishtin ka aktivistët e Lëvizjes Vetëvendosje, por ata e kanë mohuar këtë.