Kosova s’ka buxhet për ambasada

Gjatë këtij viti, MPJ-ja ka buxhet prej 18 milionë euro, kurse vetëm për funksionimin e ambasadave janë ndarë 15 milionë euro

Për shkak të mungesës së buxhetit, edhe dy vite Ministria e Punëve të Jashtme (MPJ) nuk planifikon të shpenzojë buxhet për blerjen e objekteve për ambasadat e Kosovës nëpër botë.

Gjatë këtij viti, MPJ-ja ka buxhet prej 18 milionë euro, kurse vetëm për funksionimin e ambasadave janë ndarë 15 milionë euro, ndërsa një pjesë e madhe e këtij buxheti do të shpenzohet për qiratë e ambasadave.

Shefi i diplomacisë së Kosovës, Enver Hoxhaj, ka thënë të martën se është një vendim i MPJ-së që bën përpjekje që gjatë dy viteve të ardhshme të mos blejë ndërtesa të reja për ambasada. Hoxhaj ka thënë se një pjesë e buxhetit duhet të jetë në dispozicion të zhvillimit të vendit dhe të plotësimit të kërkesave që kanë qytetarët e Kosovës brenda për brenda dhe pastaj, në një periudhë afatmesme, duhet të mendohet që edhe ambasadat tona të kenë ndërtesat e tyre.

Ministri Hoxhaj ka konsideruar se funksionimi nëpër zyre me qira është diçka e natyrshme dhe se kjo ndodh edhe te shumë vende të BE-së..