Dëshira e parealizuar e Tarashajt

“Nganjëherë dëshira është e madhe, por mundësia nuk ekziston. Gjithmonë do të dua vendlindje, shkruan Tarashaj në profilin e tij në “Facebook”

Sulmuesi shqiptar, Shani Tarashaj, bashkohet me kombëtaren e Zvicrës për eliminatoret e Botërorit “Rusi 2018”, duke shuar shpresat për një kalim të mundshëm te Kosova, shkruan albinfo.ch.

Tarashaj ka zgjedhur rrjetet sociale për të thënë se e kishte të pamundur që t’i bashkohej përfaqësueses së Kosovës, edhe pse dëshira, sipas tij, ishte e madhe.

“Nganjëherë dëshira është e madhe, por mundësia nuk ekziston. Gjithmonë do të dua vendlindje”, shkruan Tarashaj në profilin e tij në “Facebook”.

Futbollisti nuk saktëson se cilat ishin pengesat, por lë të kuptohet se rregullat e nxjerra nga FIFA penguan kalimin e tij te Kosova.

Më herët, Granit Xhaka shpjegoi me anë të një letre arsyet përse ai do të vazhdojë të luajë për Zvicrën. Xhaka tha se shkak për moskalimin e tij te Kosova u bënë rregullat e FIFA-s.

“FIFA thotë qartë se kush ka luajtur në EURO 2016, nuk ka më të drejtë të ndërrojë ekipin përfaqësues”, ka thënë mesfushori kosovar i Arsenalit.

Xherdan Shaqiri është ëndrra tjetër e adhuruesve të futbollit në Kosovë. Ai nuk u grumbullua me Zvicrën për shkak të lëndimit, kurse nuk ka dhënë deklaratë publike se për cilën Përfaqësuese do të luajë.

Edhe Valon Behrami, i cili është grumbulluar me Zvicrën, është e sigurt se do të vazhdojë me helvetikët.