Tre Ishujt, një nga mrekullitë e Shqipërisë

Këta ishuj ndodhen afër plazhit dhe mund t`i arrini edhe duke notuar. Uji është shumë i pastër si kristali, derisa plazhet janë shumë të pastra, duke bërë që të jetë një nga vendet më të vizituara nga turistët e huaj

Shqipëria është e pasur me shumë bukuri. Plazhet e saj kanë impresionuar edhe turistët e huaj. Jugu e Shqipërisë njihet si perla e Ballkanit. Për këto plazhe kanë shkruar edhe shumë media ndërkombëtare, ndërsa turistët që e vizitojnë nuk mbeten të zhgënjyer, ashtu si edhe ekipi ynë i Albinfo.ch.

Njëri nga vendet më të bukura janë Tre Ishujt në Ksamil. Këta ishuj ndodhen afër plazhit dhe mund të arrihen edhe duke notuar. Uji është shumë i pastër si kristali, derisa plazhet janë shumë të pastra, duke bërë që të jetë një nga vendet më të vizituara nga turistët e huaj, shkruan albinfo.ch.

Të gjithë janë impresionuar nga bukuria e këtij vendi dhe dëgjon vetëm fjalë të mira.

Muaji gusht është më i frekuentuari, dhe është shumë vështirë që të gjesh shtretër të lirë, pasi shumica janë të rezervuar.

Afër plazhit ka shumë restorante, që ofrojnë të gjitha llojet e ushqimit, ndërsa mund të kaloni edhe një mbrëmje të bukur, duke shijuar bukuritë e këtij vendi madhështor, që është shndërruar në një pikat më të frekuentuara në Shqipëri.

“Është një vend i mrekullueshëm. Kemi dëgjuar për këtë vend dhe nuk kemi mbetur të zhgënjyer”, thotë një turiste italiane, kurse një tjetër turist polak shton: “Çmimet janë të arsyeshme, kurse vendi shumë i mirë”.

Edhe një grup turistësh gjermanë duket se po kalojnë shumë mirë. “Është gjithçka mirë këtu. Nuk jemi penduar aspak. Njerëzit janë shumë të mirë. Gjithçka është OK”, thotë një prej turistëve nga grupi prej gjashtë gjermanëve.

Gjithashtu afër plazhit të Tre Ishujve, ka shumë plazhe tjera dhe nuk do të zhgënjeheni nga bukuria e tyre.

Nëse keni vendosur t’i kaloni pushimet në jug të Shqipërisë, sigurisht se nuk do të zhgënjeheni, që nga bukuritë e jashtëzakonshme, mikpritja, ushqimet dhe çmimet.