Niveli i ajrit në Prishtinë arrin vijën e kuqe të ndotjes

Sipas indeksit të cilësisë së ajrit, sot në orën 14:00, ajri është klasifikuar në të kuqe, ose në kategorinë i pashëndetshëm

Prishtina vazhdon të mbetet njëri nga qytetet më të ndotura në Evropë, ku cilësia e ajrit ka kaluar sinjalin e kuq të shëndetit. Sipas vlerës së indeksit të cilësisë së ajrit, të cilën e ofron Ambasada Amerikane në Kosovë, sot në orën 14:00, ajri është klasifikuar në të kuqe, ose në kategorinë i pashëndetshëm.

Përveç termocentraleve në Obiliq, që konsiderohen si ndotësit permament të kryeqytetit, edhe përdorimi i thëngjillit për ngrohje, veturat shumë të vjetra dhe kushtet e pa favorshme atmosferike, kanë ndikuar që Prishtina të shndërrohet në një qytet të pafavorshëm për banim normal.

Alarmin për ndotje e ka ngritur edhe ministrja e Mjedisit dhe Planifikimit Hapësinor, Albena Reshitaj.

“Të nderuar qytetarë, ju ekspertë e kritikë të situatës, mirëpres angazhimin tuaj në reduktimin e ndotjes së ajrit, duke reduktuar përdorimin e veturave, përdorimin e thëngjillit për ngrohje, si dhe duke dhënë kontributin tuaj konkret për reduktimin e ndotjes së ajrit”, ka shkruar ajo në reagimin dërguar mediave.

Ajo thotë se në të gjitha pjesët tjera të Kosovës mbizotëron gjendje më e mirë e ajrit, përveç në  kryeqytet dhe rrethinën e tij. Sipas ministres Reshitaj, asnjëherë ndotja e ajrit nuk është vënë si prioritet i qeverisë, madje ende asnjëherë që nga paslufta nuk ka pas komunikim ndërinstitucional të aktereve përgjegjës dhe kompetent për mbrojtjen e mjedisit.