​Pika kufitare Stançiq-Bellanoc, temë në mbledhjen e dy qeverive

Kjo pikë kufitare shkurtën për dhjetëra kilometra kalimin nga Gjilani për në Kumanovë

Pika e re kufitare ndërmjet Kosovës dhe Maqedonisë që pritet të hapet në malësinë e Karadakut, Stançiq e Bellabnoc, pritet të jetë pikë diskutimi në mbledhjen e përbashkët të dy qeverive, Kosovës dhe Maqedonisë që pritet të zhvillohet në mars. Kështu është thënë sot në takimin e përbashkët të dy komisioneve Kosovës dhe Maqedonisë.

Këto dy komisioni mikse, kanë zhvilluar takimin e radhës, ku u diskutuan temat rreth ecurisë dhe mbarëvajtjes së punëve rreth përfundimit të të gjitha procedurave të nevojshme për fillimin e ndërtimit të objektit të pikë kalimit të përbashkët kufitar “Stançiç – Bellanoc”.

“Në kuadër të këtij takimi i cili është mbajtur në Prishtinë janë shqyrtuar të gjitha veprimet e ndërmarra nga komisioni, si dhe u diskutuan edhe çështjet e bashkërendimit të aktiviteteve të përbashkëta për funksionalizimin sa më të shpejtë të pikë kalimit të përbashkët kufitar Stançiç– Bellanoc”, thuhet në njoftim, transmeton KP.

Ndryshe, zëvendëskryeministri i Kosovës, Enver Hoxhaj dhe kryeministri i Maqedonisë, Zoran Zaev, kanë diskutuar për mbledhjen e përbashkët të dy qeverive, si hapi i parë që do ta hapë rrugën e zhvillimit të bashkëpunimeve të reja në shumë fusha. Palët janë pajtuar që kjo mbledhje të mbahet në mars të këtij viti, ndërsa së shpejti do të bëhet e ditur edhe data e saktë.

Pika kufitare ndërmjet Kosovës dhe Maqedonisë në malësinë e Karadakut, është diskutuar shumë vite me radhë, madje është nënshkruar edhe marrëveshje ndërshtetërore, por kjo çështje është zvarritur nga ana e Shkupit, e cila për vite nuk e kishte asfaltuar rrugën deri në kufi. Kjo pikë kufitare shkurtën për dhjetëra kilometra kalimin nga Gjilani për në Kumanovë.