Pritje të gjata edhe në dalje të Kosovës

Në dalje të pikëkalimeve kufitare në Merdare dhe Dheu i Bardhë, raportohet për kolona të gjata të automjeteve të bashkatdhetarëve të cilët janë duke u kthyer nga pushimet për në shtetet e perëndimit ku jetojnë dhe punojnë.

Në vendkalimin kufitar në Dheun e Bardhë, kolona e pritjeve ka arritur mbi 2 kilometra. Ndërkaq shumë prej qytetarëve janë kthyer nga ky vendkalim, duke kërkuar alternativa tjera, raporton Kosovapress.

E pritjet e tilla nëpër kufij po i vuajnë më së shumti të moshuarit dhe fëmijët. Mirëpo, qytetarët shprehen se kolona të njëjta janë krijuar edhe në Merdare.

Për t’iu shmangur pritjeve maratonike, shumë prej udhëtarëve tashmë kanë vendosur që të kthehen nëpër shtëpitë e tyre dhe të kërkojnë alternativa tjera. Ata janë të mllefosur për faktin se askush nga autoritetet në Prishtinë nuk po ua qanë hallin.

Edhe Policia e ka konfirmuar se që nga orët e mëngjesit të ditës së shtunë, në dalje të pikë kalimeve kufitare në Merdare dhe te Dheu i Bardh, janë krijuar kolona të automjeteve të cilat po presin deri në 5 orë.

Zëdhënësi i Policisë së Kosovës, Baki Kelani, ka bërë të ditur për Kosovapress, se në dy pikë kalimet janë krijuar kolona të gjatësi nga autobusët, mjetet e transportit, por edhe vetura të bashkatdhetarëve të cilët po kthehen nga pushimet.

Sipas tij, nga ana e zyrtarëve policor të Policisë së Kosovës, puna është duke u zhvilluar normalisht me kapacitete dhe intensitet të shtuar, mirëpo kolonat-pritjet janë duke u shkaktuar nga autoritetet serbe.

Policia e Kosovës sugjeron të gjithë qytetareve që mundësisht të shfrytëzojnë pikëkalimet tjera kufitare me qëllim të shmangies së pritjeve të gjata në kolona të krijuara në këto pikëkalime kufitare.