“Gardhi”, filmi më i mirë në Palm Springs

Filmi “Gardhi” i regjisores Lendita Zeqiraj është fitues në Palm Springs si filmi më i mirë i shkurtër, duke fituar kështu të drejtën e garës për OSCAR.

Lajmin e ka bërë të ditur drejtori i Qendrës Kinematografike të Kosovës, Arben Zharku. “Shumë urime gjithë ekipit të mrekullueshëm të filmit, e sidomos ansamblit fantastik të aktorëve femra dhe rolit kryesor të aktorit të ri, Arti Lokaj”, ka shkruar Zharku  në Facebook, përcjell albinfo.ch.

Filmi ‘Gardhi’ është bashkëprodhim i shtëpisë filmike kosovare N’art, Sacrebleu Productions nga Franca dhe Woof Films nga Kroacia, dhe është përkrahur financiarisht nga Qendra Kinematografike e Kosovës, Cinema Fondacioni – Region Ile De France, dhe me mbështetje nga Komuna e Prishtinës.

Palm Springs International ShortFest është festivali më i madh dhe më i rëndësishëm i filmit të shkurtër në Amerikën Veriore.