Kosova vendos viza për 87 shtete

Aplikimi i regjimit të vizave është bërë në bazë të kriterit se sa paraqesin kërcënim për sigurinë e shtetit të Kosovës, për paqen dhe stabilitetin ndërkombëtar

Republika e Kosovës së shpejti do të aplikojë regjimin e vizave për 87 shtete të botës. Këtë vendim e ka marrë të premten Qeveria e Kosovës, duke miratuar kështu propozimin e Ministrisë së Punëve të Jashtme për aplikimin e regjimit të vizave hyrëse në Republikën e Kosovës.

Shefi i diplomacisë kosovare, Enver Hoxhaj ka prezantuar në mbledhjen e rregullt të Kabinetit Qeveritar propozim-vendim për aplikimin e regjimit të vizave hyrëse në Kosovës për 87 vende, kryesisht të shteteve afrikane, aziatike dhe të Amerikës latine.

Siç është raportuar më herët, aplikimi i regjimit të vizave është bërë në bazë të kriterit se sa paraqesin kërcënim për sigurinë e shtetit të Kosovës, për paqen dhe stabilitetin ndërkombëtar, si dhe për vendet e listës së zezë të Shengenit.

Sipas mediave të Kosovës, në regjimin e vizave janë përfshirë: Afganistani, Algjeria, Angola, Armenia, Bangladeshi, Benini, Burundi, Gana, Guinea-Bisau, India, Indonezia, Iraku, Irani, Jemeni, Liberia, Libia, Nigeria, Nigeri, Republika e Afrikës Qendrore, Rusia, Siera Leone, Siria, Somalia, Togo, Vietnami, Turkmenistani, Zambia, Zimbabve, Bregu i Fildishtë, Butani, Egjipti, Ekuadori, Xhamajka, etj.