Do jetë rrezik nëse nuk vihet në agjendë liberalizimi i vizave

Kryeministri i Kosovës ka mbrojtur vendimin e ekzekutivit për tërheqjen nga procesi i privatizimit dhe bartjen e një numër pronash të cilat menaxhoheshin nga Agjencia Kosovare e Privatizimit në pronësi të Komunës së Mitrovicës së Veriut, Kllokotit dhe Ranillugut duke thënë se sikur të gjitha komunave të tjera të Kosovës, edhe komunave me shumicë serbe iu kanë aprovuar kërkesat për prona shoqërore.

Haradinaj ka mohuar se kjo ëshë bërë në kuadër zbatimit të Asociacionit të Komunave me shumicë serbe. Kryeministri i është bashkuar edhe sot aksionit të pastrimit në kuadër të fushatës “Ta pastrojmë Kosovën”, që u zhvillua në parkun e Gërmisë.

Kryeministri Haradinaj tha se tash e sa vjet ka munguar kujdesi për mirëmbajtjen e hapësirave publike në kryeqytet, duke i bërë thirrje kryetarit Shpend Ahmeti dhe komunës që të kujdesen për këto hapësira të cilat u takojnë qytetarëve.

Më tej, kryeministri Haradinaj tha se të gjithë atë që e kërkojnë votën e qytetarëve, duhet të tregojnë se edhe ata mendojnë për fëmijët e këtij vendi.

“Nuk bënë te hedhim mbeturina. E kam thënë edhe më herët ne po ankohemi për liberalizim të vizave, por Evropa nuk është kështu. Ne duhet të japim sinjale të mira se jemi njerëz të vetëdijshëm”, tha kryeministri Haradinaj, duke shtuar se dikush duhet të jap llogari për këtë gjendje.