Haradinaj e Nimsa i kundërpërgjigjen presidentit

Kryeministri, Ramush Haradinaj ka komentuar pyetjen e presidentit Hashim Thaçi i cili  një ditë më parë nga Paris ka thënë se Qeveria duhet të tregojë nëse i ka votat.

Pas përfundimit të shënimit të ceremonisë së 100- vjetorit të përfundimit të Luftës së Parë Botërore, Haradinaj ka thënë se presidenti duhet ta respektojë mandatin e tij.

“Janë pushtete të ndara, besoj që presidenti duhet ta respektojë këtë”, ka thënë ai. Por Shefi i Grupit Parlamentar të Nismas, Bilall Sherifi ka thënë se Presidenti Hashim Thaçi bashkë me Listën Serbe po kërkon një qeveri të re që mbështetë projektin për korrigjim të kufirit.

Sipas tij, Thaçi do të dështojë që të sjell në krye të Qeverisë së Kosovës njerëz që do ta mbështesnin atë në këtë rrugë.

“Qëndrimet e ndryshme të Hashim Thaçit për veprimet e njëjta të Listës Serbe nuk kanë shpjegim tjetër pos përpjekje për të detyruar qeverinë që ta mbështetë aventurën e tij të rrezikshme të korigjimit të kufijve! Kam bindjen e plotë se do të dështojnë të gjitha përpjekjet e Hashim Thaçit që së bashku me Listën Serbe të sjell në krye të institucionit të qeverisë së Kosovës njerëz që do ta mbështesin projektin për korrigjim të kufirit!”, ka shkruar ai.