Komisioni s’e voton propozimin për mosintervistim të Thaçit e Haradinajt

Komisioni Hetimor Parlamentar në lidhje me ndriçimin e rastit të dëbimit të gjashtë shtetasve turq do të vazhdojë punën pa pjesëmarrjen e dy prej krerëve te shtetit, presidentit të Kosovës, Hashim Thaçi dhe kryeministrit Ramush Haradinaj, të cilit ishin të ftuar për intervistim.

Deputetja e PDK-së, Ganimete Musliu, ka kërkuar ndryshimin e rendit të ditës, pasi asnjeri nga ta nuk gjendet në Prishtinë, përcjell albinfo.ch.

Kryetari i Komisionit, Xhelal Sveçla, ka njoftuar se përderisa kryeministri ka treguar arsyet e mungesës, zyra e presidentit nuk ka dhënë fare arsyet e mungesës, edhe pse tha se janë në dijeni për vizitën e tij në SHBA.

Deputeti Driton Selmanaj ka theksuar se deri sa pushtet janë të ndara, rendi i ditës duhet të miratohet i tillë. Këtu ka reaguar deputeti i AAK-së, Muharrem Nitaj, i cili ka theksuar se Komisioni duhet t’i kërkojë falje kryeministrit Haradinaj, pasi ka caktuar intervistën e tij në ditën e takimit të dy qeverive.

Edhe Hajdar Beqaj i PDK-së e ka cilësuar këtë takim si tendencë për të mashtruar opinion publik, pasi tha se agjendat e krerëve kanë qenë publike shume kohë më parë. Komisioni ka rrëzuar kërkesën e deputetes Musliu për ta hequr nga rendi i ditës raportimin e presidentit dhe kryeministrit.